Chus Martínez
Chus Martínez é conservadora xefe do MACBA, Museu d’Art Contemporani de Barcelona, dende xullo de 2008, e ata entón foi directora do Frankfurter Kunstverein. Licenciada en Filosofía e Historia da Arte pola Universitat Autónoma de Barcelona, continuou a súa formación académica en Alemaña (Universidades de Tübingen e Lliure de Berlín) e nos Estados Unidos (Columbia University e Center for Curatorial Studies, Bard College, Nova York). A súa experiencia profesional comezou o ano 1995, no Hamburger Bahnhof-Museo de Arte Contemporánea de Berlín; de 1999 a 2001 foi co-comisaria de Parker’s Box, un espazo de arte de Williamsburg (Brooklyn, Nova York). De volta en Cataluña, en 2001 comisariou a exposición ‘Vostestaquí. Art Contemporani a Barcelona’, no Palau de la Virreina, e no Espai Montcada de la Fundació ‘la Caixa'. De 2002 a 2005 foi comisaria de exposicións na Sala Rekalde de Bilbao, e de 2006 a 2008 directora do Frankfurter Kunstverein.
Nesta institución destaca o programa de Residencia ‘Deutsche Börse Residency Program’, polo que pasaron, entre moitos outros, artistas españois como Patricia Esquivias ou Cova Macías. Tamén desenvolveu un proxecto de investigación e exposición sobre a noción de ‘Playground’ na arte, cuxa primeira parte presentouse baixo o título ‘The Great Game to Come’. Entre as exposicións realizadas no Frankfurter Kunstverein cabe destacar as dedicadas a Wilhelm Sasnal, Gardar Eide Einarsson, Pensée Sauvage, Manon de Boer ou Armando Andrade Tudela. Por outro lado, en 2005 comisariou o Pavillón de Chipre na 51ª edición da Bienal de Venecia. Nos últimos tres anos formou parte do ‘Advisory Board’ do Carnegie International, e da International Curator's Association (IKT).
