A ARTE POLO AIRE
A visita e obradoiro de educación Infantil e Primaria ten unha duración aproximada de 1 hora e 15 minutos. Para o seu mellor aproveitamento, o persoal educador organiza os participantes de cada centro en grupos de 25 alumnos/as. É necesario que os adultos que acompañan ao grupo permanezan con eles en todo momento. Non está permitido comer e beber no museo, exceptuando a zona de cafetería. Se o grupo ten algunha necesidade especial, ou se prefire adaptar a visita na súa duración ou contidos, non dubide en comunicalo con antelación ao noso departamento educativo.
Seleccionamos algunhas obras e preparamos un percorrido pola exposición para desenvolver a visita en función das idades e dos contidos que se intentan transmitir. A experiencia complétase cun obradoiro no ‘Laboratorio das artes’, o noso espazo de didáctica no primeiro andar.
A ARTE POLO AIRE
- Pode unha obra de arte voar?
- Pode ser resultado dun traballo en grupo?
Neste obradoiro tratamos de potenciar a creatividade dos participantes a través da realización dun proxecto colectivo.
Introdución á actividade:
Describimos o proxecto que imos realizar, falando do proceso, da organización e dos materiais a utilizar.
Primeira parte:
Os participantes traballan de xeito individual, creando representacións que suxiran unha mirada á terra dende o ceo.
Segunda parte:
Creamos unha obra colectiva unindo todos os traballos realizados individualmente.
Terceira parte:
Elevamos esta peza colectiva cara ao ceo a través de cordas que farán subir a nosa obra polo aire no espazo do Laboratorio das Artes.
Finalmente recollemos o traballo e levámolo con nós para decorar a aula unha vez de regreso ao centro.
