En paralelo ás exposicións temporais, o MARCO, Museo de Arte Contemporánea de Vigo, ten en marcha unha programación estable de actividades paralelas e complementarias. Así, reforzando a actividade expositiva e intensificando o carácter contemporáneo do centro, o salón de actos e outros espazos do museo acollen un conxunto de actividades nos máis variados ámbitos creativos, especialmente entre os meses de setembro e xullo: programación audiovisual, cursos, talleres, seminarios, conferencias, concertos e festivais, ademais da posibilidade de aluguer e cesión de espazos en colaboración con empresas, colectivos e institucións.
O programa educativo é parte esencial do día a día do centro, e as actividades da área de Didáctica, que se renovan en función das exposicións temporais, teñen distintos destinatarios (escolares, público infantil e adulto, familias, grupos e colectivos con necesidades específicas) e funcionan como vía de comunicación entre a sociedade e o museo. Pola súa banda, a Biblioteca-Centro de documentación organiza distintas actividades complementarias dirixidas aos seus usuarios e ao público en xeral, entre as que destaca o Club de Lectura #BiblioMARCO.
O restaurante-cafetaría Mamá Elvira, con acceso independente, e a tenda-libraría LASAL BOOKS, xunto ao vestíbulo principal, completan o círculo de servizos do MARCO aos seus visitantes.
Enlaces:
[1] https://www.marcovigo.com/sites/default/files/Noite%20Branca_600x200_0.jpg
[2] https://www.marcovigo.com/sites/default/files/Aniversario_200x150_1_0.jpg
