FESTIVAL DE JAZZ DE VIGO IMAXINA SONS 2017
A Concellería de Cultura presenta a programación da décimo terceira edición do Festival de Jazz de Vigo IMAXINA SONS, que se desenvolverá do 30 de xuño ao 8 de xullo en distintos espazos da cidade, con especial presenza do Auditorio Municipal do Concello, o MARCO e maila rúa Londres.
Imaxina Sons é unha iniciativa municipal que se mantén no tempo en base a parámetros de calidade artística e vontade de satisfacer a diversos públicos, a maiores dos afeccionados ao jazz. Unha aposta pola cultura desde o ámbito municipal, que fai que o festival poda manterse fiel aos seus principios de programar jazz europeo, dándolle aos vigueses a oportunidade de ver artistas de primeira fila, e de promocionar e apoiar o jazz galego e o jazz español.
Nesta edición, o festival preséntase coas baterías cargadas de novo baixo a batuta de Lucía Martínez; ao igual que o ano anterior, primeira edición que dirixiu, a percusionista viguesa ten como obxectivo reforzar e apoiar a presenza do jazz europeo, con especial atención á escena máis próxima. As marcas de identidade do Imaxina Sons xa son inequívocas ao longo destas edicións: atención ás figuras consolidadas e aos artistas emerxentes do jazz europeo, escaparate para as novas propostas do jazz en Galicia e na península, concertos ao aire libre que impliquen á cidadanía e apoio aos músicos e clubs da contorna próxima. Ademais Imaxina Sons debe entenderse como unha ferramenta cultural, auspiciada desde o ámbito administrativo máis próximo ao cidadán, o municipal, que ten como fin, tamén, vertebrar o espazo urbano como espazo de encontro e celebración da música.
IMAXINA SONS'17 trae á cidade o talento do jazz europeo, ou sendo máis exactos, unha boísima representación na que, ademais, destaca o talento galego. Con algunha excepción xeográfica, algo que non é inusual no festival de Vigo, como a proposta inaugural co compositor e pianista estadounidense Uri Caine, en formato trío xunto a Kenny Davis e Clarence Penn. Durante nove días consecutivos, a banda sonora de Vigo virá tamén da man de Abe Rábade, Marc Ducret, Santiago Quintáns, Carlos Bica ou Xan Campos, entre outros. Na última xornada, un dos grandes directores de orquestra de jazz, fundador da icona do free, a Globe Unity Orchestra, que aínda non visitara o festival: Alexander Von Schlippenbach, co seu Monk´s Casino.
Esta décimo terceira edición conta no seu programa con moita música feita en Galicia. Xa na segunda xornada do festival, o sábado 1 de xullo Abe Rábade presenta en Vigo o seu traballo "Once". O xoves 6 de xullo coinciden na xornada Alfonso Calvo Septet, que reúne a algúns dos músicos máis relevantes do panorama jazzístico galego, e na noite, na Rúa Londres, Alejandro Vargas Trío, presentando o seu disco "Diablito Baila", nun concerto en colaboración coa Fundación SGAE. Xa o sábado 8 de xullo, no peche de edición, Xan Campos co seu proxecto ESD, un traballo que marca unha diferenza cos seus discos anteriores conducindo cara sons máis eléctricos, jazz—rock e psiquedelia.
Haberá máis jazz de proximidade nos concertos programados en clubs e no espazo público. Marosa Jazz Project no Vitruvia Café (30 xuño) e Javier Marcos Quinteto en La Casa de Arriba (4 xullo). En sesión diurna, máis jazz en diferentes prazas e espazos da cidade da man de grupos como David Puime Trío (2 xullo) e Electric Succory (8 xullo).
Nos concertos do MARCO, coinciden en 2017 tres grandes intérpretes e compositores que desenvolven boa parte do seu traballo alén das nosas fronteiras: o saxofonista Albert Cirera (3 xullo), o frautista Julián Elvira (5 xullo) e o vigués Santiago Quintáns (4 xullo) coa súa guitarra eléctrica.
E, aínda que non é un habitual do Imaxina Sons, soará o latin jazz nesta edición. Co percusionista Yuvisney Aguilar, na noite do venres 7 de xullo na rúa Londres, nun concerto dedicado a Gonzalo Villar. Falecido o pasado mes de marzo, Villar foi un promotor e colaborador da música en directo, rexentando locais como El Malecón, Manteca ou Xancarajazz, centros de efervescencia musical diaria, que foron tamén espazos colaboradores de Imaxina Sons.
Como é habitual, o festival contará co programa de actividades “Academia de Sons” a desenvolver no MARCO por quinto ano consecutivo. Un convite á interactuación entre xeracións convidando a pequenos e maiores a experimentar ao redor da música e do jazz con incursións no audiovisual, nas artes plásticas, na tradición oral e na electrónica. A inscrición para estas actividades realizarase a través do servizo de Atención Cidadá 010, a partir do martes 20 de xuño.
As entradas para os concertos de pagamento (Auditorio Municipal e salón de actos do Marco), poranse á venda anticipadamente o xoves 15 de xuño no servizo de Ticketea (www.ticketea.com, teléfono 902.044.226 e Central de Espectáculos).
