rss feed Imprime esta páxina Envía esta páxina
Maratón Fotográfico. XXIII EDICIÓN 2018

Maratón Fotográfico. XXIII EDICIÓN 2018

Ficha

Datas: 
19 outubro 2018 - 20 xaneiro 2019
Lugar: 
Espazo Anexo e sala vestíbulo principal
Horario: 
martes a sábados (festivos incluidos) de 11.15 a 14.15 e de 17.15 a 20.45, domingos, de 11.15 a 14.15
Produción: 
AFG Agrupación Fotográfica Galega

Organizado pola AFG Agrupación Fotográfica Galega, o Maratón Fotográfico chega en 2018 á súa XXIII edición. Foi en 1995 cando a AFG organizou o seu primeiro Maratón Fotográfico ‘Concello de Vigo’, que daquela se incluía dentro das festas da Semana Grande. Dende entón, o Maratón nunca deixou de celebrarse, se ben cambiou varias veces de espazo de exposición, evolucionou no seu formato e duración, e adaptouse aos cambios derivados dos avances técnicos e da fotografía dixital. Hoxe en día, aberto á participación de calquera persoa interesada e afeccionada á fotografía, o certame articúlase en torno a catro eixos: 24 horas de duración, 4 temas, 20/25 series seleccionadas, e 3 series gañadoras.

Tomando como punto de partida a máis recente edición 2018, os espazos do MARCO acollen dúas mostras representativas, a un tempo, da historia e da actualidade do Maratón.

Na sala do vestíbulo principal, unha Retrospectiva 2013-2017, con selección de imaxes das series gañadoras nas cinco últimas edicións, que conforman unha mistura de temas, interpretacións, estilos e modos de transmitir a través da fotografía.

No Espazo Anexo, na praza peonil posterior, unha mostra dos traballos presentados nesta XXIII edición do Maratón, celebrada o 29 e 30 de setembro de 2018, en torno aos catro temas propostos: Calma, Múltiple, Resistencia, Inesquecible. Unha oportunidade para gozar dun conxunto de imaxes evocadoras, diferentes na súa inspiración e características formais, que cada participante escolleu para representar os catro temas en forma de serie fotográfica.